NADAL 2022

Despois dunhas semanas de ilusión pola proximidade  do Nadal, por fin chegan as vacacións. Queremos compartir con toda a comunidade educativa uns vídeos para felicitarvos as festas. Agradecémoslle ao Apalpador a súa visita e os agasallos que nos deixou. Bo Nadal e feliz aninovo!!!

Alumnado de Primaria

 

Alumnado de Infantil

Visita do Apalpador

MAGOSTO 2022

 O pasado venres 18 celebramos o magosto no colexio. Foi unha festa xenial malia a chuvia. Este ano tivemos moita sorte , pois todo Primaria puidemos ver como preparaban e asaban as castañas no patio. A continuación  degustámolas e logo desfrutamos de xogos populares coma noutras ocasións. Moitas grazas á Asociación "Os Asadores" por colaborar con nós.

Aquí vos deixamos un vídeo que recolle momentos dese día.

   

 En Infantil degustamos froitas do outono e tamén participamos en diferentes xogos, que vos amosamos no seguinte vídeo.

SAMAÍN 2022

Este curso celebramos o samaín con distintas actividades que resultaron moi interesantes e motivadoras para todo o alumnado. En Primaria houbo unha exposición de portadas de libros de medo elaboradas polos nenos e nenas, mentres que en Infantil optaron pola xa clásica exposición de cabazas decoradas. Ademais, en cada aula creouse un personaxe terrorífico e inventouse a súa historia. Premendo na imaxe podedes ver un vídeo no que se recollen algunhas imaxes representativas

. 

NORDÉS 2022

Aquí vos deixamos a nosa revista escolar Nordés. Esperamos que vos guste.

Nordés 2022

Publish at Calameo

DÍA DAS LETRAS GALEGAS

Feliz Día das Letras Galegas!. Este ano dedicámoslle esta festa a Florencio Delgado Gurriarán, que tanto fixo pola nosa lingua e pola nosa cultura.

No CEIP Virxe do Carme celebrámolo o venres pasado, coa participación de todo o alumnado e profesorado. Ademais de salientar a vida e obra do autor homenaxeado a ritmo de regueifa e de "Bella Ciao", asistimos á entrega dos premios do VIII concurso "Deseña a túa portada", que recaeron en Adrián Piqueras Valle (5º EP) e Adrianna García Kozlik (5º EI).

A parte que máis disfrutamos foi a danza "Indo eu a camiño de Viseu", na que tivemos que facer un bo exercicio de coordinación, xa que participamos conxuntamente tódolos nenos, nenas e profes.

Rematamos cantando o Himno Galego.

 

DÍA DO LIBRO

Dado que o día 23 de abril caeu en sábado, adiamos a actividade "apadriñamentos lectores" para o luns 26. Os nenos e nenas de 3º, 4º, 5º e 6º de primaria buscaron textos axeitados para lerlles individualizadamente aos de infantil, 1º e 2º. Todos estaban moi ilusionados por recuperar esta xuntanza que estivo suspendida dous cursos debido á situación sanitaria. Ademais, cada aula creou un slogan para destacar a importancia da lectura e en 4ºB animáronse a ler o primeiro capítulo do Quixote para o programa da radio de Proxecto Neo. 

DÍA MUNDIAL DA SAÚDE

 O día 7 de abril é o Día Mundial da Saúde. No noso colexio traballamos durante todo o curso pola consecución duns hábitos de vida saudables e quixemos celebralo facendo exercicio no exterior e participando nunhas sesións de zumba dirixidas por Lidia, a mestra de Educación Física, que fixo que o pasásemos en grande.

  

DÍA DA ÁRBORE E DÍA DA AUGA

Coa colaboración do Centro de Educación Medioambiental Gaia do Concello de Burela, celebramos esta semana os Días da Árbore (luns 21) e da Auga (martes 22). O alumnado de Primaria participou no concurso "Que árbore é?", resultando gañadora a clase de 4ºB. Parabéns! O seu premio foi plantar lavandas dentro do recinto escolar. Tamén recibiron información sobre como chega a auga ás nosas casas.

En Infantil disfrutaron co conto "O señor Encoro e a choiva". 

DÍA INTERNACIONAL DA MULLER E SEMANA DA PRENSA

 Esta semana celebramos o Día Internacional da Muller (8 de marzo) con diversas actividades encamiñadas a lembrar o importante papel das mulleres ao longo da Historia e reivindicar cambios e melloras que leven a unha verdadeira igualdade de xénero no mundo actual.

 Tamén adicamos varios días a traballar con xornais durante esta Semana da Prensa na Escola.

Podedes ver un resume do que fixeron os nenos e nenas de Infantil premendo nesta ligazón https://youtu.be/XJGjWPvDGrU.

ENTROIDO 2022

Despois de tanto tempo de restricións, e tendo en conta que a situación vai mellorando, no CEIP Plurilingüe  Virxe do Carme decidimos facer un desfile de Entroido para levar algo de ledicia a Burela.

Os nenos e nenas disfrutaron moito desta actividade, malia que o vento nos xogou algunha mala pasada durante o percorrido.

Os disfraces foron estes:

• 4º de EI: Monstros SA
• 5º de EI: Hotel Transilvania
• 6º de EI: Peter Pan
• 1º e 2º de EP: Pinocho
• 3º de EP: Mary Poppins
• 4º de EP: Mago de Oz
• 5º e 6º de EP: Alicia no país das marabillas.

Agradecemos a colaboración das familias que, unha vez máis, demostraron a súa implicación.

Neste vídeo podedes ver algunhas imaxes do desfile na rúa e no patio.

SEMANA DO MECO 2022

Durante esta semana fómonos preparando para a chegada do Entroido e, por suposto, cumprimos  os mandados do Meco. Cada día fomos engadindo un novo elemento de disfrace: algo na cabeza, algo no pescozo, algo na cintura e por último, un anteface ou os ollos maquillados. O xoves daba gusto vernos con tódolos complementos.

DÍA DE ROSALÍA DE CASTRO

 Este mércores, día 23 de febreiro, celebramos o Día de Rosalía de Castro. No noso cole homenaxeámola con diversas actividades para poñer en valor a súa obra. Comezamos xa o pasado xoves reuníndonos no patio para cantar todos xuntos o poema de Curros Enríquez "A Rosalía", que aparece no disco de Uxía "Rosalía Pequeniña". Durante esta semana continuamos traballando nas aulas a importancia da súa poesía. Podedes ver un resume premendo nesta ligazón https://youtu.be/D8-clRNP4uA

DÍA DA PAZ 2022

Hoxe, día 30 de xaneiro, celebramos o Día Escolar da Non Violencia e da Paz. Durante esta semana, no noso cole, estivemos investigando sobre cales son os símbolos empregados para representar a paz, pois máis aló da pomba branca , existen outros que merece a pena coñecer. 

Aquí vos deixamos un vídeo coa  recompilación dos seus traballos. 

Presentámosvolo  tamén en formato revista  por se queredes ler o contido con detalle. 

SÍMBOLOS DA PAZ

Publish at Calameo